ముషీరాబాద్, జూన్ 15 (జె ఎస్ డి ఎం న్యూస్) : పాఠశాల పునఃప్రారంభాన్ని పురస్కరించుకుని విద్యానగర్ ప్రభుత్వ ఉన్నత పాఠశాల (బాలురు & బాలికలు) విద్యార్థులకు సోమవారం బేగంపేట ట్రాఫిక్ ట్రైనింగ్ ఇన్స్టిట్యూట్ (టీటీఐ) ఆధ్వర్యంలో ‘వెల్కమ్ బ్యాక్ టు స్కూల్’ కార్యక్రమాన్ని ఘనంగా నిర్వహించారు. హైదరాబాద్ పోలీస్ కమిషనర్ వి.సి. సజ్జనార్, ట్రాఫిక్ జాయింట్ కమిషనర్ జోయెల్ డేవిస్, ఉన్నతాధికారుల ఆదేశాల మేరకు ఈ రోడ్డు భద్రతా అవగాహన సదస్సు జరిగింది. కొత్త విద్యా సంవత్సరంలో అడుగుపెడుతున్న విద్యార్థులకు రోడ్డు భద్రత సందేశాలతో కూడిన ప్లకార్డులతో సాదర స్వాగతం పలికారు. అంతేకాకుండా వారికి చాక్లెట్లు, పుష్పాలు అందించి అభినందనలు తెలిపారు.
అనంతరం ఏర్పాటు చేసిన అవగాహన సదస్సులో ట్రాఫిక్ నిబంధనలు, రహదారి చిహ్నాలు, పాదచారుల భద్రత, జీబ్రా క్రాసింగ్ల వినియోగం, ఫుట్పాత్ల ప్రాముఖ్యత, ట్రాఫిక్ సిగ్నల్స్ పాటించడం వంటి కీలకమైన అంశాలపై విద్యార్థులకు సమగ్ర అవగాహన కల్పించారు. ఈ సందర్భంగా ఇన్స్పెక్టర్ నాగుల అశోక్ విద్యార్థులతో నేరుగా సంభాషించి, డిజిటల్ ప్రజెంటేషన్లు, ప్రత్యక్ష ప్రదర్శనల ద్వారా రహదారి భద్రతా చర్యలను వివరించారు. రోడ్లు దాటేటప్పుడు తగిన జాగ్రత్తలు తీసుకోవాలని, మొబైల్ ఫోన్లు వాడుతూ పరధ్యానానికి గురికావద్దని, పాదచారుల కోసం కేటాయించిన జీబ్రా క్రాసింగ్లను మాత్రమే ఉపయోగించాలని స్పష్టం చేశారు.
విద్యార్థులు తమ ఇళ్లలో తల్లిదండ్రులు, కుటుంబ సభ్యులు కూడా ట్రాఫిక్ నియమాలను పాటించేలా ప్రోత్సహించాలని, ప్రతి ఒక్కరూ రహదారి భద్రతపై బాధ్యతాయుతంగా వ్యవహరించాలని ఇన్స్పెక్టర్ పిలుపునిచ్చారు. రోడ్డు భద్రత అనేది ప్రతి పౌరుడి ఉమ్మడి బాధ్యత అని, విద్యార్థులు తమ సమాజంలో రోడ్డు భద్రతా రాయబారులుగా మారాలని హైదరాబాద్ ట్రాఫిక్ పోలీసులు ఆకాంక్షించారు. ఈ విశేష అవగాహన కార్యక్రమంలో పాఠశాల ప్రధానోపాధ్యాయురాలు రాణి, ఉపాధ్యాయ బృందం, పాఠశాల సిబ్బందితో పాటు బేగంపేట ట్రాఫిక్ ట్రైనింగ్ ఇన్స్టిట్యూట్ సిబ్బంది సాయికుమార్, కృష్ణ మరియు విద్యార్థులు పెద్ద సంఖ్యలో పాల్గొన్నారు.
