బేగంపేట్, జూన్ 25:
ప్రకాష్ నగర్ పరిధిలో పాదచారులు, వాహనదారుల రాకపోకలకు ఇబ్బందిగా మారిన అక్రమ ఆక్రమణలపై ట్రాఫిక్ పోలీసులు ఉక్కుపాదం మోపారు. మల్కాజ్గిరి పోలీస్ కమిషనర్ బి. సుమతి, ఐపీఎస్ ఆదేశాల మేరకు, ట్రాఫిక్-1 డిప్యూటీ కమిషనర్ ఆఫ్ పోలీస్ (డీసీపీ) కె. రాహుల్ రెడ్డి సూచనలతో గురువారం బేగంపేట్ ట్రాఫిక్ పోలీస్ స్టేషన్ పరిధిలోని ప్రకాష్ నగర్ ప్రాంతంలో ప్రత్యేక డ్రైవ్ నిర్వహించారు. ట్రాఫిక్ త్రిముల్గెర్రీ డివిజన్ అసిస్టెంట్ కమిషనర్ ఆఫ్ పోలీస్ (ఏసీపీ) జి. శంకర్ రాజు పర్యవేక్షణలో సిబ్బంది ఈ ఆపరేషన్ను ముమ్మరంగా చేపట్టారు.
ఈ ప్రత్యేక డ్రైవ్లో భాగంగా ఫుట్పాత్లను, ప్రజా రహదారులను అడ్డగిస్తూ రోడ్లపైకి చొచ్చుకొచ్చిన అనధికార నిర్మాణాలు, వ్యాపార సామగ్రి, తోపుడు బండ్లు మరియు ఇతర అడ్డంకులను అధికారులు పూర్తిగా తొలగించారు. రోడ్లను ఆక్రమించడం వల్ల ట్రాఫిక్కు తీవ్ర అంతరాయం కలగడమే కాకుండా, పాదచారులు ప్రాణాలను గుప్పిట్లో పెట్టుకుని రోడ్లపై నడవాల్సి వస్తోందని ఏసీపీ శంకర్ రాజు ఈ సందర్భంగా పేర్కొన్నారు. ఈ తొలగింపులతో ప్రకాష్ నగర్ పరిసర ప్రాంతాల్లో పాదచారుల రాకపోకలకు మార్గం సుగమమైంది.
ప్రజా రహదారులు, ఫుట్పాత్లను అక్రమంగా ఆక్రమించడం చట్టరీత్యా నేరమని అధికారులు ఈ సందర్భంగా తీవ్రంగా హెచ్చరించారు. వ్యాపారస్తులు తమ పరిమితులకు లోబడే వ్యాపారాలు నిర్వహించుకోవాలని, ప్రజలకు ఇబ్బంది కలిగిస్తే సహించేది లేదని స్పష్టం చేశారు. రానున్న రోజుల్లోనూ ఈ విధమైన అక్రమ ఆక్రమణలపై ప్రత్యేక తనిఖీలు మరియు కఠిన చర్యలు నిరంతరాయంగా కొనసాగుతాయని ట్రాఫిక్ పోలీసులు తేల్చి చెప్పారు.
