వైసీపీ అధినేత జగన్ పార్టీ ఏర్పాటు చేసినప్పటి నుంచి ఇప్పటి వరకు ఇతర పార్టీలతో ఎప్పుడూ పొత్తులు పెట్టుకోలేదు. ఎన్నికల్లో ఒంటరిగానే పోటీ చేస్తున్నారు. దాంతో జగన్ అభిమానులు ఈ విషయం గురించి గొప్పగా చెబుతుంటారు. సింహం సింగిల్ గా వస్తుందని సోషల్ మీడియాలో కామెంట్లు పెట్టడం మనం చూస్తుంటాం. అయితే ఇప్పుడు పరిస్థితి మారిపోయిందా అనే సందేహాలు ఆ పార్టీ నాయకుల్లో సైతం వ్యక్తం అవుతున్నాయి.

రెండు రోజుల క్రితం సిపిఐ జాతీయ నాయకులు రామకృష్ణ, రాష్ట్ర కార్యదర్శి గుజ్జుల ఈశ్వరయ్య వైసీపీ అధినేత జగన్ ను కలిశారు. రాష్ట్రంలో కరువు పరిస్థితిపై నిర్వహించనున్న రౌండ్ టేబుల్ సమావేశానికి వైసిపిని ఆహ్వానించేందుకు జగన్ ను కలిసినట్లు సిపిఐ నాయకులు చెబుతున్నారు. కానీ అసలు సంగతి అది కాదని ప్రచారం జరుగుతుంది.

రాష్ట్రంలో టీడీపీ, జనసేన, బీజేపీ కూటమి పార్టీలు బలంగా వున్నాయి. గత ఎన్నికల్లో ఈ మూడు పార్టీలు కలిసి దిమ్మతిరిగే విజయం సాధించాయి. వచ్చే ఎన్నికల్లో కూడా ఇదే కూటమి పోటీకి వెళ్లడం ఖాయంగా కనిపిస్తుంది. ఇన్నాళ్లు కూటమి విచ్చిన్నం కోసం వైసీపీ ఎదురుచూసింది. కూటమి నాయకుల మధ్య విభేదాలు వచ్చి విడిపోతే తప్ప వైసీపీ విజయం సాధించడం కష్టం. అది జరిగే పరిస్థితి కనిపించడం లేదు. దాంతో వైసీపీ కొత్త ఆలోచనలు చేస్తున్నట్లు ప్రచారం జరుగుతుంది.