ఒంగోలు : ప్రభుత్వ వైద్యశాలలకు వచ్చే ప్రతి ఒక్క రోగికి నాణ్యమైన వైద్య సేవలు అందించడంతో పాటు వైద్యులు, సిబ్బంది సమయపాలనను కచ్చితంగా పాటించాలని జీజీహెచ్ అడ్మినిస్ట్రేటర్ వెంకటరమణ స్పష్టం చేశారు. ప్రభుత్వం వైద్య రంగానికి అత్యంత ప్రాధాన్యతనిస్తూ ఆసుపత్రుల్లో అవసరమైన మౌలిక సదుపాయాలు, వైద్య సేవలను విస్తరిస్తున్న నేపథ్యంలో ప్రజలకు సేవలందించడంలో ఎలాంటి నిర్లక్ష్యానికి తావు ఉండకూడదన్నారు. జీజీహెచ్ ఆసుపత్రిలో వైద్యుల సేవల అందుబాటు, సమయపాలన, ఓపీ విభాగాల్లో వైద్యుల హాజరు తదితర అంశాలపై అడ్మినిస్ట్రేటర్ వెంకటరమణ ప్రత్యేకంగా సమీక్ష నిర్వహించారు. ఈ సందర్భంగా ఆసుపత్రిలోని వివిధ విభాగాలను ఆయన ప్రత్యక్షంగా పరిశీలించారు. డిప్యూటీ సూపరింటెండెంట్ డాక్టర్ నామినేని కిరణ్ కుమార్, సీఎస్ఆర్ఎంఓ డాక్టర్ మాధవిలతతో కలిసి అడ్మినిస్ట్రేటర్ ప్రతి ఓపీ విభాగాన్ని సందర్శించారు. ఆయా విభాగాల్లో వైద్యులు అందుబాటులో ఉన్నారా, రోగులకు వైద్య సేవలు ఏ విధంగా అందుతున్నాయి, ఓపీ కార్యకలాపాలు సక్రమంగా జరుగుతున్నాయా అనే అంశాలను ప్రత్యక్షంగా పరిశీలించి సంబంధిత వైద్యులను అడిగి వివరాలు తెలుసుకున్నారు.ఈ సందర్భంగా ఆయన మాట్లాడుతూ ఉదయం 9 గంటల నుంచి సాయంత్రం 4 గంటల వరకు వైద్యులు విధుల్లో తప్పనిసరిగా అందుబాటులో ఉండేలా చూడాలని స్పష్టం చేశారు. వందలాది మంది రోగులు ప్రతిరోజూ జీజీహెచ్‌కు వైద్య సేవల కోసం వస్తున్నారని, వారందరికీ ఎలాంటి ఇబ్బందులు కలగకుండా సంబంధిత విభాగాలకు చెందిన వైద్యులు అందుబాటులో ఉండాల్సిన అవసరం ఉందన్నారు.ప్రతి విభాగాధిపతి తమ పరిధిలోని వైద్యులు, సిబ్బంది సమయపాలనను నిరంతరం పర్యవేక్షించాలని సూచించారు. ఓపీ సమయాల్లో వైద్యులు అందుబాటులో ఉండటం వల్ల రోగులకు వేచి ఉండే సమయం తగ్గడంతో పాటు వైద్య సేవలు మరింత సమర్థవంతంగా అందించడానికి అవకాశం ఉంటుందన్నారు.ఎవరైనా వైద్యులు సెలవు తీసుకోవాల్సిన పరిస్థితి ఉంటే ముందస్తుగా సంబంధిత అధికారుల అనుమతి తీసుకోవాలని అడ్మినిస్ట్రేటర్ స్పష్టం చేశారు. అనుమతి లేకుండా విధులకు గైర్హాజరు కావడం లేదా విధుల సమయపాలనలో నిర్లక్ష్యం వహించడం సరికాదన్నారు.ప్రస్తుతం ఉచిత ప్రభుత్వ వైద్య సేవలు అందుబాటులో ఉండటం, ఆరోగ్య రంగంలో ప్రభుత్వం తీసుకుంటున్న పలు చర్యల నేపథ్యంలో జీజీహెచ్‌కు వచ్చే రోగుల సంఖ్య పెరుగుతోందన్నారు. ముఖ్యంగా పేద, మధ్యతరగతి ప్రజలకు ప్రభుత్వ ఆసుపత్రులు ప్రధాన ఆధారంగా ఉన్నందున, వారికి పూర్తి స్థాయిలో వైద్య సేవలు అందించడం వైద్యులు, సిబ్బంది బాధ్యత అని పేర్కొన్నారు. ప్రజలకు అందుబాటులో ఉండటం, సమయపాలన పాటించడం ప్రభుత్వ వైద్య సేవల్లో అత్యంత కీలకమైన అంశాలని ఆయన తెలిపారు. రోగులు ఆసుపత్రికి వచ్చినప్పుడు సంబంధిత విభాగంలో వైద్యులు అందుబాటులో లేకపోవడం వల్ల వారికి అసౌకర్యం కలగకుండా అన్ని విభాగాధిపతులు ప్రత్యేక శ్రద్ధ వహించాలని ఆదేశించారు.అనంతరం జీజీహెచ్‌లోని అన్ని విభాగాధిపతులతో అడ్మినిస్ట్రేటర్ వెంకటరమణ సమావేశం నిర్వహించి వైద్య సేవలు, ఓపీ నిర్వహణ, వైద్యుల హాజరు, సమయపాలన తదితర అంశాలపై సమీక్షించారు. రోగులకు నిరంతరాయంగా మెరుగైన వైద్య సేవలు అందించేందుకు అవసరమైన చర్యలు తీసుకోవాలని సూచించారు.వైద్యుల సమయపాలన విషయంలో ఎలాంటి రాజీ ఉండదని, విధుల పట్ల నిర్లక్ష్యం లేదా నిర్దేశిత సమయాల్లో అందుబాటులో లేకపోవడం వంటి అంశాలు గుర్తిస్తే నిబంధనల ప్రకారం చర్యలు తప్పవని అడ్మినిస్ట్రేటర్ వెంకటరమణ స్పష్టం చేశారు. ప్రభుత్వ వైద్యశాలకు వచ్చే ప్రతి రోగికి గౌరవప్రదంగా, బాధ్యతాయుతంగా, సమయానుకూలంగా వైద్య సేవలు అందించడమే ప్రధాన లక్ష్యంగా అధికారులు, వైద్యులు, సిబ్బంది సమన్వయంతో పనిచేయాలని ఆయన సూచించారు.
Save or share this story as a newspaper-style Epaper Clip:
