మురసు తుఫాను తీరం వైపు దూసుకొస్తున్న నేపథ్యంలో ప్రకాశం జిల్లా యంత్రాంగం అత్యంత అప్రమత్తమైంది. తుపాను ప్రభావం తీవ్రంగా ఉండే అవకాశం ఉండటంతో, ప్రజల ప్రాణ, ఆస్తి నష్టాలను నివారించడమే లక్ష్యంగా జాయింట్ కలెక్టర్ కల్పనా కుమారి గారు, ఒంగోలు ఆర్డీవో తో కలిసి కొత్తపట్నం తీరప్రాంతంలో విస్తృతంగా పర్యటించారు. ఈ పర్యటనలో భాగంగా మొదటగా కొత్తపట్నం బీచ్‌ను సందర్శించిన జాయింట్ కలెక్టర్, అక్కడ వేటకు సిద్ధమవుతున్న మరియు తీరంలో ఉన్న మత్స్యకారులతో మాట్లాడారు. ప్రస్తుత సముద్ర అలల ఉద్ధృతిని, వాతావరణ మార్పులను వివరించి, తుపాను తీవ్రత తగ్గే వరకు ఎవరూ సముద్రంలోనికి వేటకు వెళ్లకూడదని గట్టిగా హెచ్చరించారు. ఇప్పటికే వేటకు వెళ్లిన వారిని తక్షణమే రేడియో సమాచారం ద్వారా వెనక్కి పిలిపించాలని అధికారులను ఆదేశించారు.
అనంతరం కొత్తపట్నంలో ఏర్పాటు చేసిన సహాయక కేంద్రాన్ని (రిలీఫ్ సెంటర్) జాయింట్ కలెక్టర్ తనిఖీ చేశారు. కేంద్రంలో బాధితులకు కల్పిస్తున్న సౌకర్యాలు, వసతులను క్షుణ్ణంగా పరిశీలించిన ఆమె, అధికారులకు పలు కీలక సూచనలు చేశారు. లోతట్టు ప్రాంతాలు, పెంకుటిల్లు, గుడిసెలలో నివాసముంటున్న కుటుంబాలను ఎలాంటి ప్రమాదం జరగక ముందే సురక్షితంగా పునరావాస కేంద్రాలకు తరలించాలని ఆదేశించారు. సహాయక కేంద్రాల్లో ఉన్న వారికి ఎటువంటి ఇబ్బంది కలగకుండా స్వచ్ఛమైన తాగునీరు, నాణ్యమైన భోజనం, నిరంతర విద్యుత్ సరఫరా మరియు అవసరమైన వైద్య సేవలు అందించేందుకు ప్రత్యేక మెడికల్ క్యాంపులు సిద్ధం చేయాలని స్పష్టం చేశారు. విద్యుత్ కోతలు ఏర్పడే అవకాశం ఉన్నందున ప్రత్యామ్నాయంగా జనరేటర్లు, ఇన్వర్టర్లను సిద్ధంగా ఉంచాలని సూచించారు.
ఈ సందర్భంగా జాయింట్ కలెక్టర్ కల్పనా కుమారి గారు మాట్లాడుతూ… తుపాను విపత్తును ఎదుర్కొనేందుకు జిల్లా పరిపాలనా యంత్రాంగం పూర్తి స్థాయిలో సిద్ధంగా ఉందని, ప్రజలు ఎలాంటి ఆందోళనకు గురికావాల్సిన అవసరం లేదని ధైర్యాన్నిచ్చారు. అయితే, ప్రజలు నిర్లక్ష్యంగా ఉండకుండా అధికారుల సూచనలను తప్పక పాటించాలని విజ్ఞప్తి చేశారు. ముఖ్యంగా మత్స్యకారులు తమ పడవలను, వలలను తీరం దాటించి సురక్షిత ప్రాంతాల్లో భద్రపరుచుకోవాలని కోరారు. ఏ క్షణంలోనైనా అత్యవసర సహాయం అందించేందుకు NDRF, SDRF బృందాలతో పాటు స్థానిక పోలీసులు, రెవెన్యూ యంత్రాంగం 24 గంటలూ అందుబాటులో ఉంటారని తెలిపారు. పుకార్లను నమ్మవద్దని, అధికారికంగా ఇచ్చే హెచ్చరికలను మాత్రమే పరిగణనలోకి తీసుకోవాలని కోరారు. అత్యవసర సహాయం కోసం మండల కంట్రోల్ రూమ్‌ను సంప్రదించాలని సూచించారు.
ఈ పర్యటనలో జాయింట్ కలెక్టర్ వెంట ఒంగోలు ఆర్డీవో చంద్ర శేఖర్ నాయుడు, స్థానిక తహశీల్దార్, తీరప్రాంత పర్యవేక్షణ అధికారులు మరియు వివిధ శాఖల ప్రభుత్వ సిబ్బంది పాల్గొన్నారు.
Save or share this story as a newspaper-style Epaper Clip:
