హైదరాబాద్‌ జులై 18(జే ఎస్ డి ఎం న్యూస్)
నగరంలో ఆహార కల్తీకి అడ్డుకట్ట వేయడమే లక్ష్యంగా హైదరాబాద్‌ పోలీస్‌ కమిషనర్‌టాస్క్‌ఫోర్స్‌ పరిధిలోని ‘హైదరాబాద్‌ ఫుడ్ అడల్ట్రేషన్ సర్వైలెన్స్ టీమ్’ (H-FAST) శనివారం చాంద్రాయణగుట్ట పరిధిలో మెరుపు దాడులునిర్వహించింది. జీహెచ్‌ఎంసీ ఫుడ్ సేఫ్టీఅధికారితో కలిసి నిర్వహించిన ఈ ప్రత్యేక తనిఖీల్లో తీవ్ర నిబంధనల ఉల్లంఘనలు వెలుగుచూశాయి. ప్రజారోగ్యానికి ముప్పు వాటిల్లేలా ఆహారాన్నివిక్రయిస్తున్న రెండు ఫాస్ట్‌ఫుడ్‌ కేంద్రాలపై కేసులు నమోదు చేసిన పోలీసులు, ముగ్గురు వ్యక్తులనుఅదుపులోకి తీసుకున్నారు. తదుపరిచట్టపరమైన చర్యల కోసం నిందితులను,స్వాధీనం చేసుకున్న సొత్తునుచాంద్రాయణగుట్ట పోలీసు స్టేషన్ ఎస్ హెచ్ ఓ ముందుహాజరుపరిచారు.చాంద్రాయణగుట్టలోనిఅల్-మదీనా చైనీస్ ఫాస్ట్ ఫుడ్ సెంటర్, ఒమర్ చైనీస్ ఫాస్ట్ ఫుడ్ సెంటర్లలో ఈ తనిఖీలు జరిగాయి. ఈ కేంద్రాల్లో అత్యంత అపరిశుభ్రమైన వాతావరణంలో ఆహారాన్ని తయారు చేస్తున్నట్లు అధికారులు గుర్తించారు. వాడేసిన వంట నూనెను పదే పదే ఉపయోగించడంతో పాటుప్రమాదకరమైన కృత్రిమరంగులను వాడుతున్నట్లు తేలింది. వీటితో పాటు పెస్ట్ కంట్రోల్ రికార్డులు నిర్వహించకపోవడం, నీటి విశ్లేషణ ధృవీకరణ పత్రాలు లేకపోవడం, సూచించిన ఆహార పరిశుభ్రత ప్రమాణాలను పూర్తిగా విస్మరించడం వంటి ఉల్లంఘనలకు పాల్పడినట్లు అధికారులు నిర్ధారించారు.
ఈ దాడుల్లో భాగంగా సుమారు 20 లీటర్ల నిల్వ వంట నూనె, 10 లీటర్ల తాజా వంట నూనె, 40 కిలోల ఫ్రైడ్ చికెన్, నిబంధనలకు విరుద్ధంగా రంగులు కలిపిన 40 కిలోల పచ్చి చికెన్‌తో పాటు 3 బాక్సులు, 6 ప్యాకెట్ల కృత్రిమ సింథటిక్ ఫుడ్ కలర్స్‌ను అధికారులు స్వాధీనం చేసుకున్నారు. స్వాధీనం చేసుకున్న ఈ సొత్తును తదుపరి విచారణ నిమిత్తం చాంద్రాయణగుట్ట పోలీసులకు అప్పగించారు. ఈ ప్రత్యేక తనిఖీలను H-FAST ఇన్‌స్పెక్టర్లు ఎన్. రంజిత్ కుమార్ గౌడ్, ఎం. అంజయ్యల పర్యవేక్షణలో, సబ్ ఇన్‌స్పెక్టర్ వి. శంకర్, బృందం నిర్వహించగా, జీహెచ్‌ఎంసీ సర్కిల్ నెం. 23 ఫుడ్ సేఫ్టీ ఆఫీసర్ ఆర్. దైవనిధి కూడా పాల్గొన్నారు.
ఈ సందర్భంగా కమిషనర్స్ టాస్క్‌ఫోర్స్ డిప్యూటీ కమిషనర్ ఆఫ్ పోలీస్ గైక్వాడ్ వైభవ్ రఘునాథ్, ఐపిఎస్ ఒక ప్రకటన విడుదల చేస్తూ నగర ప్రజలకు కీలక సూచనలు చేశారు. అపరిశుభ్ర వాతావరణంలో నడిచే, గుర్తింపు లేని సంస్థల నుండి ఆహార పదార్థాలను కొనుగోలు చేయవద్దని కోరారు. వినియోగదారులు ఆహార ఉత్పత్తులను కొనుగోలు చేసే ముందు తప్పనిసరిగా FSSAI లైసెన్స్, తయారీ, గడువు ముగిసే తేదీలను, సరైన లేబులింగ్‌ను తనిఖీ చేసుకోవాలని సూచించారు. నగరంలో ఎక్కడైనా ఆహార కల్తీ లేదా అపరిశుభ్రమైన పద్ధతులపై సమాచారం తెలిస్తే తక్షణమే H-FAST టోల్-ఫ్రీ నంబర్ 8712661212 కు ఫిర్యాదు చేయాలని, ప్రజారోగ్యాన్ని రక్షించడానికి హైదరాబాద్ సిటీ పోలీస్ ఎల్లప్పుడూ కట్టుబడి ఉంటుందని ఆయన స్పష్టం చేశారు.